Panadeiras sen rede

Cabeceira da Revista Galega de Teatro

“Unha viravolta fresca e radical. Un salto sen rede que promete un futuro cheo de teatro.”

Hai unha semana presentabamos PAN!PAN! na Sala 1 da Fundación SGAE dentro do Galicia Escena Pro, a feira do teatro galego. E nós, que hai pouco que chegamos aquí e non sabemos moito destas cousas pensamos que o mellor era ir alí co noso mellor producto, o PAN! (PAN!).

As butacas enchéronse e vimos como a rapazada (nesta ocasión de entre 4 e 89 anos) situábase de pé polas escaleiras e o corredor nun espazo pequeno pero brincallón (como o canciño de Kiki, a cantante do Saloon). E, aínda así, moitos quedaron fóra. Á xente non lle gusta quedar fóra cando van ver un espectáculo pero din que é bo sinal para a compañía xerar tanta expectación. Dillo a eles. Máis dun tivo dobre  desgusto, o primeiro por non poder ver o espectáculo e o segundo por perder de comer un pan boísimo que repartimos entre os asistentes á entrada.

O bo é que as dúas teñen solución. A xente de Santiago de Compostela poderá vernos na Zona C do 10 ao 14 de decembro. E o pan que repartimos tamén está na cidade e provén dunha panadería que, coma nós, é ben artesana e coidadosa co seu produto, Pan da Moa. Aquí podedes ver máis

Ah! E para saber o que pasou durante a función xa tedes a crítica de Roi Vidal no blog da Revista Galega de Teatro   na que di cousas como a da cita coa que comezabamos esta entrada no caderno. Sen rede!

Abrimos o noso forno dixital!

Fotografía Pilar Abades

Abrimos o forno dixital de A panadaría. Dámosvos a benvida á nosa web!

Xa levábamos un tempo traballando nesta páxina e estamos moi contentas co resultado, vai coma un tiro! Podedes ver fotos das tres panadeiras e do noso espectáculo PAN!PAN!, as datas de actuación e contactar con nós. Serve para o que serve unha web! Tamén teremos este caderno onde iremos poñendo novas, anécdotas e outros contos.

A principal responsábel de que teñamos páxina web do trinque é Noelia Fernández, o noso Harry. Esta e todas as fotografías da web foron feitas por Pilar Abades e a maquillaxe e perruquería foi cousa de Sonia Balado Figueroa. Aquí podedes encontrar máis fotos de Pilar, todas moi feitiñas.

E se vos presta un cambio na vosa imaxe, mirade o que fai Sonia cunhas tesoiras.

Por último, tivemos a inmensa sorte de que a dona da panadería Vema de Petelos (Mos) nos permitira emporcallar o seu forno con papeis e confetis. Ben é verdade que, despois, nos permitiu tamén limpalo todo, he!